En a Schüssel kommt e Pfendle
Woizemehl - des hat sich glei -
Oier drüber zwei bis drei,
Wasser ond au Salz e Quentle.
S`Ganze schlägt mer na wia domm
solang en dr Schüssel rom
bis mer´s Toigle schließlich glatt hot
ond dui Arbeit ghörig satt hot.
Ond wenn´s na no Blose gheit -
liabe Leit, no iscs soweit!
Mittlerweil´kocht´s Wasser schau,
gsalze muß mer´s vorher hau.
Jetzt kommt´s Spatzebrettle dra,
Toig druf ond no schabt mer munter,
( des will glernt sei, bis mer´s ka )
ällen Toig ens Wasser nunter.
So, ond jetzt guckt mer en Ruh
dere Gschicht e Weile zu
send e paar Minütle rom,
ruft mer dreimol: Spätzle komm!
ond schau schwemmet älle dia
Spätzle obe en dr Brüah.
Uffpasst jetzt ond net lang bsonne
rausgfischt älle no isch gwonne
ond damit´s koin wüschte Papp gheit
wurd des ganze Wasser abgseit.
So, ond will mer jetzet no,
wenn mer´s ka, was übrigs do,
schmelzt mer halt die Spätzle gschwend,
weil se so am Beschte send.
Wie mer´s isst? - I glaub, des brauch
i eich net uff d´Nas´nuffbenda:
D`Spätzle went no en de Bauch
schau alloinig nonterfenda